'Mɛa' "wɛin 'pʋʋ 'a ‑gbɛɛ'‑ wlu‑
116
Kɩɩn, 'ma 'jeɛ Tʋ "bo 'a "dia,dɛ ‑nʋɛ ‑bo 'ma seɛ 'daa, ɛɛ 'wɔn 'ma wlu 'mɛ.
2 Ɛ toɛ 'ʋn doun" o,
'ma muɛ 'daa 'de 'ma 'kmʋ nɩa' ‑wee'‑ 'ʋn.
3 'Mɛa' kpʋn ɛ 'ʋn bɩ wɔ,
'mɛa' 'a ‑cri'ma kpʋn 'ʋn ɛ,
‑wɛe "jrii "kae 'a ke, faʋn klaa" ‑mɩ "ji 'de 'ʋn.
4 ‑Wɛe 'ɩn po Tʋ "bo ‑tooi":
'ma bae ‑ʋn ɛ, Tʋ "bo, ‑ɩn ji ‑ɩn ‑je 'ʋn 'pʋʋ',
5 Tʋ "bo a nʋɛ ‑aʋn 'saa 'ʋn "jrii,
‑wɛe ‑aa Kea nmɔ 'diwɔn.
6 Tʋ "bo a siɛ nyʋ ‑ʋʋa nabʋ 'srɛa "i o;
ɛmɛ ‑pʋʋ' 'ʋn ‑ta 'ɩn nɩa wɛenyɔ ɛ.
7 'Ma ‑suu, ‑ɩn ‑je ‑ma pɛe 'a blua' ‑nɩa see 'deɛ,
dɛ ‑nʋɛ Tʋ "bo nʋɛ ‑ʋn 'dɔe "jrii.
8 Kɩɩn, Tʋ "bo, ‑mɔ ‑seie 'ʋn 'de mɛa' 'kwa,
‑mɔ ‑sa 'ʋn "mii "ni "jrii,
‑mɔ nʋɛ ‑wɛe 'ɩn se i ‑ka.
9 Ɛmɛ ‑tɩ ɛ, ‑ta 'ɩn nɩa 'kmʋ ɛ,
'ɩn ke Tʋ "bo a muɛ naa,
‑wɛe ɛɛ' "jri 'je 'ʋn ‑pʋn" nɩ‑.
10 Kɩɩn, 'ɩn ‑teɛ' Kea ‑kwlɩ" mamaʋ 'sʋ;
‑ta 'ma wlua ‑wɛe 'ɩn 'na: 'Ɩn nɩɛ wɛenyɔ ɛ.
11 Tai' ''maa 'ʋn ɛ, 'de dɛ 'ma 'tmʋa ɛ ka:
nyiɔ 'oo nyiɔ ‑wee'‑ nɩɛ sɩ 'tmʋ i ‑o.
12 Dɛ 'ɩn 'bɛɛ‑ 'ɩn 'je Tʋ "bo "nyɩ,
'de dɩ 'dɔe ‑tuu" ‑tuu ɛ nʋa 'ʋn "jrii 'a ‑kwɔ "i ɛ?
13 'Ma muɛ 'pʋʋa' 'a ‑tiɛn ‑gblʋ 'jɛi" kpaa',
‑wɛe 'ma mu Tʋ "bo 'a ‑cɛ" 'kpa ‑pee wlu 'a,
14 ‑wɛe 'de ɛɛ' 'cɛ ‑wee'‑ "klein "juɛi,
dɩ ‑ɩa wlu 'ɩn 'cɛan ‑tie" 'de Tʋ "bo ‑pee ɛ,
'ma muɩ nʋa'.
15 Nyʋ ‑ʋʋa' pooa wlu fai" 'a 'kmʋ nmɔ "jrii,
'de Tʋ "bo "jri 'de.
16 'Oo Tʋ "bo, 'ɩn se ‑ma dbonʋɩ nɩɩ‑?
Kɩɩn, ‑ma dbonʋɩ, ‑ma dbonʋnynɔkpao' 'a "ju;
‑mɔ ‑cɛn' 'ʋn ‑gbae ceɛ' "dbi i.
17 'Ma muɛ 'sraa ‑saa' 'ɩn 'je ‑ʋn ‑nyɩ",
'de dɩ ‑ɩn nʋa 'ʋn "jrii 'a ‑tɩ' 'ʋn,
‑wɛe 'ɩn 'je ‑ʋn ‑pee wlu ka, 'oo Tʋ "bo.
18 Kɩɩn, 'de ɛɛ' 'cɛ ‑wee'‑ "klein "juɛi,
dɩ ‑ɩa wlu 'ɩn 'cɛan ‑tie" 'de Tʋ "bo ‑pee ɛ,
'ma muɩ nʋa',
19 'de Tʋ "bo 'a ‑gbu" di,
'de ‑ma 'cɛ "kwlu, Selisalɛmʋ.
Ao 'bɛɛ‑ Tʋ "bo 'a 'nynɩ "i.